قصيدة حبيبتي مشكلة...من أشعار خميس عز العرب

النهار على قد شوقك ... شقشقينى
غرقينى ف بحر شايل شمس بكره لحد دارك
لملمى خوفى ف مدارك
ضيقه كل المدارك
وف عنيكى الكون و كل الأسئله
حبيبتى إنتى مشكله

الضل مايل ع الطريق .. ضلى انحنى
ماعدتش تفرق ضِلك انتى ضَلك انتى ولا انا
حضن الشجر رامى الورق تحت الخـُطى
من بعد ما دابت قلوبنا و السنين شبعت شقا
يا قلبى إيه ؟ صدق بقى
ماعدش فيه ف الكون طيور بتحب طعم الزقزقه

مفضلش غيرك يا وحيد
عيط بقى مستنى ايه ؟
لسه اللى بيحبك بعيد
وما حد بيدلك عليه

يا قلبى لو ف ضلوعى سور
سيبها و اموت و انت تعيش
كان نفسى تتغير .. تثور
تدى الأمانى جناح وريش
وشجره نونو مورقه
يا قلبى ايه ؟ صدق بقى
ماعدش فيه ف الكون طيور
بتحب طعم الزقزقه

قصيدة غيرانين...من أشعار عزيزة علي

و غَيرانين

عشان صُورتَك شَافوها سَابحة

فــ عُيوني ...ـ

شَافوك مَرسوم على .... الننِي

و ضلةِ شُوق على ... جُفوني



شَافوك التاج على راسي

و سِبحة بَرَكة

فــ إيِديني

شَافوك الدَعوة فــ المَغرِِب

و شَربةِ ميه .... تِحيني

شَافوك مَكتوب على

جبيني ...ـ



كما البحار تِناجي البَر

فــ شُطوطي

و عِشق وَلَدتهُ مِن ..... صُوتي

شَافوك سارِح بتوُب دَرويش

..... فــ مَلَكوتي



شَافوك الحَرف و الأشعار

فــ مَوهِبتي

و شَرخ النَغمة عـَـ المِزمار

فــ تَغرِيبتي



شَافوك فــ سكُوتي و كَلامي

شافوك فارِس لأيامي

و ريشة رَسم .... أحلامي

و جوا البَحر ..... مَركِبتي



شَافوك فــ ضلوعي

ألف نَهار

شَافوك قَنديل .. يضَوّي بقلبهُ

أوحَش ليل

و رؤية مَتبتبغيش تأويل

و بَلسّم بَسمِتَك ....

حالِف

يطَيب أي قلب ... عَليل

و نادر يعتكِف فــ الصُوم

لو أرجعَ مرة عَن غيبتي



شَافوك مُفتاح لأبوابي

و سِيدي و كُل .... أحبابي

شَافوك ماسِح ... لأعتابي

و ساكِن قسوتي .. و طيبتي

شَافوك عُكاز فــِ غَيم شِيبتي



و غَيرانين

عَشان سألوك .. أيا مَسجون

لــ فين ياخدوك ....ـ

جاوبت لو إرتضيت بالسَجّن

يكَون السِجن فــ [ حَبيبتي ] ..

قصيدة بياع الفل...من أشعار خميس عز العرب

  انا مش كامل
و مش محدود
أنا بنتهي و بعود
ألضم عيدان الفل الابيض للقلوب السود

انسان أنا
و بعزم ما اداني الأله حبيت
و بكل حقي ف الخطي خطيت
و بكل جهلي بالخطأ أخطيت
خطيت بايدى الألف جر الألف للياء
مش ذنبي اني اتولد جوايا سيل أشواق
انسان بقي
و ان سنّ لي الأنسان سنانه و سن لي للكون قانون
برضك هاكون
مستني صوت البكا و الضحك ف المولود
و الضم عيدان الفل الابيض للقلوب السود

و ما تسألوش
لا الأسم واضح ف البيان
و لا وشي بان بين الوشوش
و لا عيني شافت غير قزاز النضارات
و لا صوتي حسسكوا بحاجات
أنا طيف و عدى من سكات
بضحك سكات
و ابكي بسكات
و اسأل سكات
أنا قلبي عايش و لا مات ؟
و ان كنت ميت هو فين الدود ؟
حكمة وجودى اني مالي وجود
و اديني مالي وجود و بس
جوّايا حبة حس
أقدر أدس دماغي ف الرمله الغريقه
و أعسّ ع اللقمه و اهش الجوع
و ما أقفش ف الممنوع
و أقدر أشوف القمر لما الليالي تجود
و هستني ضحكة ولد يوم ما الحبيبه تعود
و الضم عيدان الفل الابيض ...للعيون السود