قصيدة حاجات بسيطة...من أشعار علي سلامة

حاجات بسيطة

كلها حاجات بسيطة

وأد إيه بتفرق معايا

أد إيه..

زي إيه..؟

زي لما الفرحة تيجي لوحدها

زي إحساس بالرضا

وزي ما حبك كده

وزي دمعة طيبة

أرتاح بعدها

وماعرفش ليه..

وزي إيه..

زي وردة ف عيد ميلادي

وزي يوم بسيط وعادي

عدي لكن مانستهوش..

وكلمة حلوة سمعتها

من قلب حد ماعرفهوش..

زي ما فضفض معاك

بكلمتين..

وف وسطهم أسرح

تقوللي روحت فين..

وزي إحساس بالأمان

لما ليلة أبات ف حضن

أصغر ولادي..

وزي غنوة من بعيد

فيها من ريحة بلادي

كلها حاجات بسيطة

وأد إيه بتفرق معايا..

أد إيه..

قصيدة نفسي أشوفك...من أشعار علي سلامة

اللي باقي من ملامحي..
لون عيونك..
والنهارده نفسي أشوفك..
لو تعيط..
لو تشخبط فوق حيطاني..
لو تبقعلي هدومي..
تبتسم دمعة همومي..
ليل نهار أحسب ف سنك..
نفسي تكبر تبقي طولي..
وتبقي نوري وأبقي ضلك..
نفسي أسمع صوتي منك..
بس إوعي..
تبقي غازي وانتهازي..
واللا طوبة طايشة..
بتكسر إزازي..
إوعي تبقي زي أبوك..
إوعي يابني يجلدوك..
يطحنوك..
إوعي مرة يغربوك..
نفسي أشوفك.
بس إوعي
تبقي يابني زي أبوك