كنت دايماً
لمّا بعرف
اني ماشي
مش بسلّم
كنت بقفل من سكات الباب ورايا
و هات يا سلّم
كنت خايف من عيون اللي عايزني أقوم أوام
كنت خايف
من حنينهم في السلام
من دموع مش عايزة تنزل
بس باينة في الكلام
" مش هشوفك حتى بُكرة ؟ "
بابقى عارف إني ماشي
بس برضه برُد
ماشي !
و ابتدي تخطيط للحظة
قلبي عارف
مش هاتحصل
و اعمل ايه لما ابقى أوصل
و السؤال يبدأ عليّا؟
و اعمل ايه لو مرة أعرف
السؤال مش منها هي؟
طب و ماله؟
مانتَ عارف
الدوام لله يا شاطر !
خلي بالك من مشاعرك
خلّي بالك مـ المخاطر
كف ايدك لما سلّم
حط قلبك في السلام
فـ السلام لو كان متين
اعرف الأوجاع منين
ابتدي قول بالسلامة
و اوعى تنسى الابتسامة
تبقى صادقة
جوة قلبك
اللي مهروس بالكفوف
خلي بالك من شبابك
خلي بالك مـ الظروف
و ابتسم و اعمل حسابك
و انتَ ماشي تسيب حاجات
و اما تمشي تكون في حالك
رُد بابك
من سـُكات
ليست هناك تعليقات:
إرسال تعليق