قصيدة نفسي أشوفك...من أشعار علي سلامة

اللي باقي من ملامحي..
لون عيونك..
والنهارده نفسي أشوفك..
لو تعيط..
لو تشخبط فوق حيطاني..
لو تبقعلي هدومي..
تبتسم دمعة همومي..
ليل نهار أحسب ف سنك..
نفسي تكبر تبقي طولي..
وتبقي نوري وأبقي ضلك..
نفسي أسمع صوتي منك..
بس إوعي..
تبقي غازي وانتهازي..
واللا طوبة طايشة..
بتكسر إزازي..
إوعي تبقي زي أبوك..
إوعي يابني يجلدوك..
يطحنوك..
إوعي مرة يغربوك..
نفسي أشوفك.
بس إوعي
تبقي يابني زي أبوك